Uppskriftir

Plokkfiskur

Uppskrift

350 g fiskur (t.d. ýsa eða þorskur), soðinn eða bakaður
salt
350 g kartöflur
½ laukur
1½ msk smjör
2 msk hveiti
250 ml mjólk
(hvítur) pipar

Leiðbeiningar

Settu fiskinn í pott ásamt svolitlu salti og köldu vatni svo rétt fljóti yfir, hitaðu að suðu, slökktu undir pottinum og láttu fiskinn bíða í soðinu í 5-6 mínútur. Taktu hann þá upp úr.

Sjóddu kartöflurnar þar til þær eru meyrar, flysjaðu þær og skerðu þær í bita.
Afhýddu laukinn og skerðu hann frekar smátt.

Bræddu smjörið í potti, settu laukinn út í og láttu hann krauma í um 5 mínútur við fremur vægan hita án þess að brúnast.

Stráðu hveitinu yfir og hrærðu vel. Láttu krauma í um 1 mínútu. Hækkaðu þá hitann, helltu mjólkinni saman við smátt og smátt og hrærðu vel á meðan. Lækkaðu hitann aftur þegar sýður og láttu sósuna malla í um 5 mínútur; hrærðu oft svo hún brenni síður við (bættu við svolítilli mjólk ef hún er mjög þykk). Taktu hana svo af hitanum.

Settu fiskinn út í (gott að stappa hann dálítið með gaffli fyrst) og hrærðu rösklega. Settu svo kartöflurnar út í og hrærðu. Bættu við ögn meiri mjólk ef plokkfiskurinn er mjög þykkur.

Kryddaðu plokkfiskinn með töluvert miklum pipar (helst hvítum, svona upp á útlitið) og salti eftir smekk – smakkaðu þig bara áfram. Sumir vilja bragðbæta hann með örlitlu sinnepi eða karrídufti, hvítlauk eða öðru, og svo er oft stráð söxuðum graslauk eða vorlauk yfir.

En annars er það bara rúgbrauð og smjör með.

Um uppskriftina

Plokkfiskur er einhver mesti mömmu- og hversdagsmatur sem hægt er að hugsa sér en ég hef líka borið hann fram í fínum veislum og hann hefur alveg slegið í gegn.

Hann á við næstum hvar og hvenær sem er - og tiltölulega einfalt að elda hann. Það sem þú þarft aðallega að passa er að hitinn verði ekki of hár svo að laukurinn fari ekki að brúnast og svo að sósan verði kekkjalaus.

Ef illa fer og hún verður öll í kekkjum sem ekki fara þótt þú hrærir eins og brjálæðingur (betra að nota písk en sleif, ef þú átt hann), þá skaltu hella henni í gegnum sigti og setja svo aftur í pottinn.

Fyrir: 2 til 3

Uppruni uppskriftar: Nóatún

Ég eldaðieftir þessari uppskrift

Þessi uppskrift eruppáhalds