Uppskriftir

Vatnsdeigsbollur Einfalt & fljótlegt

Uppskrift

80 g smjör
2 dl hveiti
2 dl vatn
¼ tsk salt
1 stórt egg

Leiðbeiningar

Smjör brætt í potti og hveiti bætt út í – blandað saman.

Vatni hrært saman við (ágætt að nota pískara) og látið malla á meðalhita (hræra stöðugt) þar til deigið losnar frá pottinum – verður að einni stórri bollu (blandan á að sjóða).

Potturinn tekinn af hellunni (blandan aðeins látin kólna). Egg sett í og hrært saman við með sleikju.

Salt sett síðast – blandað saman.

Ofninn hitaður í 225°C (yfir- og undirhiti).

Kúlur mótaðar með skeið og gaffli – settar á ofnplötu með bökunarpappír. Ef bollurnar eiga að vera sérstaklega fallegar er sniðugt að setja deigið í rjómasprautu og sprauta þeim á. Ath. Gatið þarf að vera frekar stórt svo það komist auðveldlega í gegn.

Stærð bollana er algjört smekksatriði. Mér finnst betra að hafa þær frekar litlar – fjöldinn getur verið 10 -16 bollur.

Bakast í 15 – 20 mínútur (háð stærð). Ekki opna ofninn á meðan bollurnar bakast – þá eru meiri líkur á að þær falli.

Látið kólna á grind – skreytt með t.d. glassúr og/eða flórsykri.

Meðlæti: Frábærar með rifnu núggati og rjóma eða með sultu eins og t.d. hindberjasultu eða rifsberjahlaup og rjóma.

Um uppskriftina

Uppskriftin kemur úr safni mömmu en áður fyrr bakaði hún þessar bollur á bolludaginn.

Í dag verða Semlor alltaf fyrir valinu en ég ákvað að dusta rykið af þessari uppskrift og bjóða upp á þær.

Sænsku semlurnar eru á sérstökum stalli en þessar þóttu líka mjög góðar. Eiginlega má segja að þær hafi komið mjög skemmtilega á óvart og þá sérstaklega með núggati og rjóma.

Það má alveg mæla með þessum vatnsdeigsbollum….

þær eru góðar, ofureinfaldar og fljótlegar.

Undirbúningstími: 20 mín.
Eldunartími: 20 mín.
Fyrir: 10 - 16 bollur

Uppruni uppskriftar: Hanna.is

Ég eldaðieftir þessari uppskrift

Þessi uppskrift eruppáhalds